LHF félagar
sem mættir voru á æfingu í Vesturbæjarlaugina
í janúarlok 2004. Mynd: KP. <STÆKKA>
Langhlauparafélagið er frekar óformlegur
félagsskapur áhugahlaupara af öllum stærðum
og gerðum sem gera sín hlaup út frá
Reykjavík, Akureyri, Kaupmannahöfn og víðar.
LHF Reykjavík er fjölmennasta deildin, æfir
þrisvar í viku, þ.e. mánudaga og fimmtudaga
kl. 17.45 og laugardaga kl. 10. Hlauparar í LHF Rvík
eru um 30 talsins og öllum velkomið að taka þátt.
Sagan
Upphaf Langhlauparafélagsins má rekja allt aftur
til sumarsins 1997 er skokkfélagið Þokki var
stofnað fyrir korthafa líkamsræktarstöðvarinnar
Þokkabótar í Vesturbæ. Hlaupasysturnar
Martha og Bryndís Ernstdætur veittu hópnum
forstöðu í upphafi (sumrin 1997 og 1998) en
sumarið 1999 tók Oddgeir Ottesen við hópnum.
Upphaflega var starfsemi hópsins aðeins á
sumrin en frá haustinu 1999 fjölgaði þeim
sem stunduðu hlaup í Þokkabót það
mikið að ákveðið var að starfrækja
hlaupahópinn allan ársins hring. Í júnímánuði
2000 byrjaði hlaupahópurinn að hlaupa frá
Vesturbæjarlaug og hefur gert út þaðan
síðan. Oddgeir stýrði hópnum fram
til sumarsins 2001, er hann hélt af landi brott til frekara
náms, og tók þá við Þorlákur
Jónsson í samvinnu við fleiri.
Margir metnaðarfullir einstaklingar hafa tekið miklum
framförum frá því þeir hófu
að æfa langhlaup með hlaupahópnum og vakið
mikla athygli fyrir frábæran árangur í
þeim hlaupum sem þeir hafa tekið þátt
í. Þessu til staðfestingar má nefna
hlauparana Rannveigu Oddsdóttur og Þorlák
Jónsson sem hafa á fáum árum komist
í hóp fremstu hlaupara landsins.
En þrátt fyrir góðan árangur
í keppnum er Langhlauparafélagið alls ekki
hugsað aðeins fyrir keppnismenn í hlaupum. Stefnan
er að vera með breiðan hóp fólks sem
vill hlaupa í keppnum og eins fyrir þá sem
vilja hlaupa sér til ánægju og yndisauka.
Lagt er upp úr því að hafa mismunandi
þjálfunarkerfi, þannig að allir geta
fundið eitthvað við sitt hæfi miðað
við líkamsástand og markmið hvers og eins.
Ef þú hefur áhuga á hlaupum, hreyfingu
utandyra eða vilt æfa með keppni í huga
þá er Langhlauparafélagið eitthvað
sem þú mátt ekki láta fram hjá
þér fara.
